“Night of Worship and Testimonies”: Gentil Misigaro na Meddy Bateguye Ibihe Bidasanzwe byo Guhimbaza Imana muri Canada

Abahanzi b’amazina akomeye mu muziki wa Gospel, Gentil Misigaro na Meddy, bagiye gutaramira abakunzi b’umuziki w’Imana muri Canada mu bitaramo bidasanzwe byiswe “Night of Worship and Testimonies.” Ibi bitaramo bitegerejwe n’abakunzi ba Gospel mu mijyi itandukanye bizaba bigamije gusangira ubuhamya no kwatura Imana mu ndirimbo.

Iki gikorwa cyateguwe na Kal Prime kizanyura mu mijyi itatu y’amajyepfo ya Canada: Montreal, Toronto, na Ottawa. Ni umwanya uteganyijwe kuzaba wihariye wo guhimbaza no gusenga Imana, aho aba bahanzi bazaririmba indirimbo zabo zakunzwe na benshi, zirimo izo kubwira Imana no gutanga ubuhamya bw’ibyo yabakoreye.

Amatariki n’Aho Ibitaramo Bizabera:

1. Montreal – Iri joro ry’umunezero rizatangirira muri Montreal ku wa 14 Ukuboza, rikabera ahitwa Resurrection.

2. Toronto – Ku wa 15 Ukuboza, iki gitaramo kizasakara mu mujyi wa Toronto kibere ahitwa Stone Church.

3. Ottawa – Abasore n’inkumi b’i Ottawa bazahurira na Gentil Misigaro na Meddy ku wa 21 Ukuboza, aho igitaramo kizabera muri Algonquin Commons Theatre.

Iki gikorwa gifite intego yo gukomeza no kubyutsa ukwemera, no gushima Imana mu buryo bwo gusabana kandi bunoze. Gentil Misigaro n’umuririmbyi Meddy, bahuza abakunzi babo mu ndirimbo n’ibihangano byibanda ku gukomeza ubugingo, gukiza imitima, no kongera urukundo mu babagana.

Kwinjira mu Gitaramo:

Abakunzi b’aba bahanzi bashishikarizwa kugura amatike hakiri kare kugira ngo baze kwifatanya nabo muri ibi bihe by’amasengesho n’ubuhamya. Amatike arimo kuboneka kuri interineti, kandi abakeneye amakuru arambuye bayabona mu buryo bworoshye bakoresheje amakuru ari ku matangazo ya buri gitaramo.

Iki gikorwa cya Night of Worship and Testimonies kitezweho kuzana impinduka nziza mu mitima y’abitabiriye, kikaba kizaba ari igihe cy’imboneka rimwe cyo guhimbaza, gusenga no kuganira ku byiza by’Imana binyuze mu buhamya n’indirimbo zihembura  umutima.