Informer
Hari amakuru akomeje gucicikana avuga ko Perezida wa Repubulika Iharanira Demokarasi ya Congo (RDC), Félix Tshisekedi Tshilombo, yaba afite impungenge ko aramutse avuye mu gihugu, ashobora guhita akorerwa kudeta n’umutwe wa M23. Ibi bivugwa ko ari imwe mu mpamvu zituma yanga guhurira mu biganiro na Perezida Paul Kagame, byari gutegurwa na Perezida w’u Bufaransa, Emmanuel Macron.
Amakuru aturuka mu nzego zitandukanye zigaragaza ko umutekano wa RDC ukomeje guhungabana, cyane cyane mu burasirazuba bw’igihugu. Umutwe wa M23 umaze iminsi wigarurira ibice byinshi by’Intara ya Kivu y’Amajyaruguru, ndetse ubu ukomeje kwagura ibitero muri Kivu y’Amajyepfo. Ibi bituma hari abakeka ko ushobora gutera Kinshasa cyangwa ugashyigikira indi mitwe y’imbere mu gihugu ishobora guhungabanya ubutegetsi bwa Tshisekedi.
Abasesenguzi ba politiki bavuga ko icyemezo cya Tshisekedi cyo kwanga ibiganiro na Perezida Kagame gishobora kuba gishingiye ku mpamvu zitandukanye, zirimo gukomeza kwerekana ko adashyigikiye imishyikirano n’u Rwanda, ariko kandi hakaba n’igitutu cy’imbere mu gihugu cyaturuka ku batavuga rumwe n’ubutegetsi bwe.
Iyi myitwarire ya Tshisekedi yo kutava mu gihugu si ubwa mbere igarutsweho. Hari abemeza ko ari ubwoba bwo gutakaza ubutegetsi mu gihe yaba adahari, cyane ko umwuka wa politiki mu gihugu ukomeje kuba mubi, ndetse hakaba hari impamvu zishingiye ku mutekano we bwite.
Kugeza ubu, nta cyemezo gihamye cyafashwe ku biganiro hagati ya RDC n’u Rwanda, ndetse birasa nk’aho umubano w’ibihugu byombi ukomeje kuzamo agatotsi. Gusa, igihe kizagaragaza niba koko izi mpungenge za Perezida Tshisekedi ari impamo cyangwa ari ibihuha bikomeje gukwirakwizwa muri politiki y’akarere.
GIPHY App Key not set. Please check settings