Mugeyo Heritier waririmbye Irembo ni muntu ki?

Mahirwe Mugeyo Heritier, umuhanzi mushya winjiye mu muziki wa gospel, amaze gushyira hanze indirimbo ye ya mbere yise “Irembo”, ikomeje kwigarurira imitima ya benshi kubera ubutumwa bwayo bukangurira abantu ubusabane n’Imana. N’ubwo yinjiye mu muziki vuba, afite ubuhanga mu bindi bikorwa by’ubwubatsi, cyane cyane mu kubaka imihanda, ibyo yigiye mu Bushinwa.

Mahirwe ntiyaretse umwuga we w’ubwubatsi burundu, ahubwo yinjiyemo umuziki wa gospel nk’uburyo bushya bwo gutanga umusanzu we mu buryo bw’umwuka, atanga ubutumwa bwo gukangurira abantu gusanga Kristo. Indirimbo “Irembo” ishimangira ko yifitemo impano idasanzwe yo guhimbaza Imana, kandi benshi bamwitezeho gukomeza gukora indirimbo zifasha abantu mu rugendo rwabo rw’ubugingo.

Afite umubano ukomeye n’umuziki, aho mushiki we Daniella yamamaye cyane kubera kuririmbana n’umugabo we James mu muziki wa gospel. Nk’uko Daniella na James bagiye bazamuka mu ruhando rwa muzika, benshi bari bategereje kureba aho Mahirwe azerekeza, cyane cyane ko afite intumbero yo kugera ku bantu benshi binyuze mu ndirimbo ze zifite ubutumwa bwimbitse bwo kwizera.