in Amakuru

Perezida Tshisekedi Yanze Kwitabira Inama ya EAC , M23 Ikomeza Gushimangira Inyota yo Kurenganura Abaturage ba Congo bavuga Ikinyarwanda

by Informer January 28, 2025, 4:51 am 314 Views

Perezida wa Repubulika Iharanira Demokarasi ya Congo (RDC), Félix Antoine Tshisekedi, yanze ubutumire bwa Perezida wa Kenya, William Ruto, bwo kwitabira inama idasanzwe y’Umuryango w’Afurika y’Iburasirazuba (EAC) yari iteganyijwe kubera i Dar es Salaam, Tanzania. Iyo nama yari igamije kwiga ku bibazo by’umutekano muke mu burasirazuba bwa Congo, by’umwihariko intambara hagati y’umutwe wa M23 n’ingabo za Congo (FARDC).

Umuvugizi wa Perezida Tshisekedi, Tina Salama, yavuze ko uyu mwanzuro wafashwe bitewe n’uko ibintu bimeze muri iki gihe, ariko ntiyasobanura byinshi ku mpamvu z’iki cyemezo.

Umutwe wa M23, ukunze kuvugwa cyane mu ntambara z’i Congo, umaze igihe ushimangira ko impamvu nyamukuru yawo ari ukurengera uburenganzira bw’abaturage bavuga ururimi rw’Ikinyarwanda bakomeje gutotezwa no guhezwa mu gihugu cyabo. Aba baturage bahora bahura n’ivangura, kwamburwa uburenganzira bwabo bw’ibanze, ndetse bamwe bagafatwa nk’abanyamahanga mu gihugu baturukamo kuva kera.

M23 ivuga ko idaharanira guhungabanya umutekano wa RDC, ahubwo ko iharanira gushyira ku murongo ibibazo by’uburenganzira bwa muntu, by’umwihariko iby’abaturage bavuga Ikinyarwanda. Uyu mutwe kandi unakomeza gutunga agatoki Leta ya Congo kuba yarananiwe gukemura ibibazo by’ivangura n’itoteza.

U Rwanda, nk’igihugu gikomeje gushaka amahoro mu karere, rufite uruhare runini mu biganiro byo kugarura umutekano. Nyamara, rwakomeje gushinjwa na Leta ya Congo gushyigikira umutwe wa M23, ibirego u Rwanda rwamaganiye kure ruvuga ko ari uburyo bwo kuyobya uburari ku bibazo by’imbere muri Congo. U Rwanda rwakunze gusaba ko ibibazo by’amahoro n’ubumwe mu karere byakemurwa binyuze mu biganiro bihuriweho kandi byubahiriza ukuri n’ubwuzuzanye.

Ese EAC Izashobora Gutanga Igisubizo?

Mu gihe inama ya EAC yari itegerejweho kwiga kuri ibi bibazo idasanzwe, kutitabira kwa Perezida Tshisekedi ni ikimenyetso gikomeza kugaragaza uburyo umuti w’amakimbirane yo mu burasirazuba bwa Congo ukomeje kudindizwa no kubura ubushake bwa politiki.

Ibihugu byo muri EAC, birimo u Rwanda, Kenya, Uganda, na Tanzania, bikomeje gushaka uburyo bwo kugera ku mahoro arambye binyuze mu biganiro no gushakira hamwe umuti w’ibibazo birimo gukurikirana imitwe yitwaje intwaro, ariko umwuka mubi hagati ya RDC n’u Rwanda ukomeje kuba imbogamizi.